Mia cara Venexia el to canalasso
xe colmo de giubili, de canti, de ciasso;
de arazi e bandiere; de richi festoni
xe ornae le altane, xe pieni i balconi,
e in mezo al tripudio ghe xe che più val:
ghe xe la Regata, la Regata Real.
Foresti che parla inglese o todesco,
francesi che alegre vol gòderse el fresco
le tose che canta, da festa vestie,
i fiori, la gioia, do, tre melodie
vien su da le barche . . . spetacolo ugual
pol solo donarlo el nostro Canal.
Ma za da lontan un colpo se sente
se agita tuti, se struca la zente,
par tuto se dixe 'na sola parola:
atenti creature che adeso i se mola.
E in mezo a un tripudio che fa sbalordir
dei bei regatanti se vede l'ardir.
Xe primo Morucchio, ma no Scuciareto,
ti vedi Verzotto che bate el socheto . . .
la barca de Aricisa xe quela de viola
ma quela de Crea de serto no mola . . .
No i core, ma i svola, pò i gira el paleto
e i riva a quel palco bramà, benedeto.
I pope ben saldi, de razza gran fiera
'sti grandi campioni xe tuti in bandiera
e fra canti e struconi, fra basi e vin bon,
ti senti le note del "nostro leon".
Col bianco, col rosso, col verde e col blu
ti senti el procheto che fa gru, gru, gru . . .
Cò tuti i so fioi Venexia ga vinto,
"de serto de gloria il leone s'è cinto".
E cielo se indora, le stele risplende,
xe l'acqua ormai stanca de tante vicende . . .
Xe vero, creature, spetacolo ugual
pol vedarse solo nel nostro Canal
